குஷ்புவின் குபீர் பிரசாரம்

மு.க.ஸ்டாலின், கனிமொழியின் பிரசாரப் பயணத்தில் விடுபட்டுப்போன

மதுரைக்குத் தி.மு.க. அனுப்பிவைத்த பிரசார பீரங்கி குஷ்பு!

முதல் பிரசாரக் களம் மதுரை என்பதால், மு.க.அழகிரி வீட்டுக்கு ஆசி வாங்க, 10 மணிக்கு தன் சகோதரருடன் ஹோண்டா சிஆர்-வி காரில் வந்து இறங்கினார் குஷ்பு. மணிக்கணக்கில் காத்திருந்த பத்திரிகையாளர்களுக்கு, இருவரது சந்திப்புக் காட்சியை போட்டோ எடுக்கக்கூட அனுமதி கிடைக்கவில்லை. அந்தக் கடுப்போ என்னவோ, வெளியே வந்த குஷ்புவிடம் எடுத்த எடுப்பிலேயே கற்புப் பிரச்னை குறித்துக் கேள்வி கேட்டார் ஒரு நிருபர். 'அது முடிந்து போன விஷயம். உச்ச நீதிமன்றமே தீர்ப்பு சொல்லியாச்சு!' என்று குஷ்பு பதில் சொல்லியும்... 'கற்பு குறித்த கருத்தால் பெண்கள் உங்கள் மீது அதிருப்தியில் இருக்கிறார்கள். அது பிரசாரத்தில் எதிரொலித்தால்..?' என்று விடாப்பிடியாக நிருபர் கேட்க... கடுப்பாகி, 'நீங்க அ.தி.மு.க-காரரா?' என்று கருணாநிதி ஸ்டைலில் கோபமாகக் கேட்டுவிட்டுப் பிரசார வேனில் ஏறியவர், ஜெயலலிதாவைக் கிழிக்க ஆரம்பித்தார்.

அவரது பேச்சைக் கேளுங்கள்!

'எல்லாரும் நல்லா இருக்கீங்களா? தொ​டர்ந்து நல்லா இருக்கணும்னா, நீங்க வாக்களிக்க வேண்டிய சின்னம் உதயசூரியன். ஏன்னா, உங்களுக்காக உழைச்சு பல நல்ல திட்டங்களை கலைஞர் நிறைவேற்றி இருக்கார். இவ்வளவு நாளும் கொட நாட்டில் படுத்துத் தூங்கின அந்த அம்மா, தேர்தல் வந்ததும் மக்களுக்காகக் கவலைப்படுற மாதிரி நடிக்கிறாங்க. இன்ஸ்டன்ட் இட்லி, இன்ஸ்டன்ட் காபி மாதிரி திடீர் திடீர்னு ஆர்ப்பாட்டம் நடத்தினாங்க. உங்களை யாராவது ஏமாற்ற முடியுமா என்ன?

'அந்த அம்மா ரொம்ப மாறிட்டாங்க... முன்ன மாதிரி காலில் விழச் சொல்றதில்லை, மற்ற தலைவர்களையும் உட்கார வெச்சுப் பேசுறாங்க’ன்னு சிலர் சொன்னாங்க. ஆனா, கூட்டணிக் கட்சிக்காரங்களுக்கே தெரியாம 160 தொகுதிகளுக்கும் வேட்பாளர்களைத் தன்னிச்சையா அறிவிச்சு, 'நான் பழைய திமிர் பிடிச்ச, அகம்பாவம் பிடிச்ச ஜெயலலிதாதான்’னு நிரூபிச்சிட்டாங்க. அஞ்சு வருஷங்களா ஒண்ணாவே இருந்த ஒருத்தரைத் தூக்கி வெளியே எறிஞ்சிட்டாங்க. மக்களாகிய உங்களையும் தூக்கி எறியத் தயங்க மாட்டாங்க.

நாங்க எல்லாம் சினிமா கதாநாயகிகள். ஆனா, கலைஞரோட வாக்குறுதிகளே இந்தத் தேர்தலோட உண்மையான கதாநாயகி. சினிமாவில் கஷ்டமான காட்சியில் 'டூப்’ போடுவாங்க. ஆனா, அந்த அம்மா தேர்தலில் 'டூப்’ போடுறாங்க. சொந்தமாத் தேர்தல் அறிக்கை எழுதக்கூட நேரம் இல்லாத, பொறுமை இல்லாத, அக்கறை இல்லாத அவங்களுக்கா உங்க ஓட்டு?

கருவறை முதல் கல்லறை வரைக்கும் தி.மு.க-வோட திட்டங்கள் போய்ச் சேர்ந்திருக்கு. நீங்க கண்ணைக் கசக்கக் கூடாதுன்னு காஸ் அடுப்பும், பொழுதுபோக்குக்கு டி.வி-யும் கொடுத்திருக்கார் கலைஞர். அந்த அம்மா ஆட்சிக்கு வந்தா, டி.வி., அடுப்பு எல்லாத்தையும் புடுங்கிட்டுப் போயிடுவாங்க. மதுரையில் நான் பிரசாரத்தைத் தொடங்கக் காரணம், இந்த மண்ணோட 'தில்’லுதான். ஆண்டவனே வந்து பாட்டு எழுதினாக்கூட அதில் தப்பிருக்குன்னு தைரியமா சொல்றவங்க நீங்க. 'நெற்றிக் கண் திறப்பினும் குற்றம் குற்றமே’னு சொல்ற தைரியசாலிங்க. இந்த மண்ணுக்கு வந்ததும் எனக்கே அதிக தைரியம் வந்திருக்கு.

பத்துப் பதினைந்து வருஷங்களுக்கு முன்னாடி ஷூட்டிங்குக்காக மதுரைக்கு வந்தா, மீனாட்சியம்மன் கோயில், திருமலை நாயக்கர் மகாலைத் தவிர பார்க்கிறதுக்கு ஒண்ணும் இருக்காது. இப்பப் பாருங்க... பெரிய பெரிய கட்டடங்கள், பா​லங்கள்னு மலேசியா மாதிரி இருக்கு மதுரை. காரணம் அழகிரி அண்ணன்தான்.

விஞ்ஞானத்தில் நியூட்டன் ஃபார்முலா, சினிமாவில் ரஜினி ஃபார்முலா மாதிரி தேர்தலில் அழகிரி அண்ணனோட ஃபார்முலா​தான் சக்ஸஸ் ஃபார்முலா. தென் மண்டலத்தைத் தன் மண்டலமா மாத்தி, அப்புறம் பொன் மண்டலமா மாத்தின அழகிரி அண்​ணனின் சின்னம் உதயசூரியன். கண்டிப்பா ஓட்டுப் போடுங்க. தேர்தல் முடிஞ்சதும் நன்றி சொல்ல கண்டிப்பா வருவேன். அப்ப உங்க வீட்டில்தான் சாப்பிடுவேன்... சரியா?' என்று வீதி வீதியாகச் சொல்லியபடியே சென்ற குஷ்பு, வெயில் உச்சிக்குப் போக ஓய்வுக்குக் கிளம்பினார். மாலையில் வேறு காஸ்ட்யூமில் அவரது பிரசாரம் மீண்டும் தொடர்ந்தது.

பள்ளி மாணவிகளிடம், 'உங்களுக்கு லேப் டாப் கம்ப்யூட்டர் தர்றதா தாத்தா சொல்லியிருக்கார். அதனால் அவருக்கே ஓட்டுப்போடணும்னு வீட்டில் சொல்லணும், சரியா செல்லம்?' என்றவர், தாய்க்குலத்தைப் பார்த்து, 'என்னை மாதிரி புசுபுசுன்னு குழந்தை பிறக்கணும்னா, கலைஞருக்கு ஓட்டுப் போடுங்க. கர்ப்பிணிப் பெண்களுக்கு பத்தாயிரம் கொடுக்கப் போறதா சொல்லியிருக்கார்...' என்று தமாஷாகப் பேசினார்.

ஆனால், பெண்கள் எல்லாரும் அவரது சேலை, பாசி மற்றும் கையில் பச்சை குத்தியிருந்ததையே ரசித்துப் பார்த்தனர். ஜாக்பாட் நிகழ்ச்சியில் விதவிதமாக ஜன்னல் ஜாக்கெட் அணிந்து வந்த குஷ்பு பிரசாரத்தில் ஏமாற்றிவிட்டாரே என்பது ஆண்களின் கவலை!

நன்றி ஜுனியர் விகடன்